ಭಾರತದ ವಿವಿಧ ರಾಜ್ಯಗಳಲ್ಲಿ ವಿವಿಧ ರೀತಿಯ ಸಂಪ್ರದಾಯಗಳಿವೆ. ಅದೇ ರೀತಿ, ರಾಜಸ್ಥಾನದ ಜೈಸಲ್ಮೇರ್ ಜಿಲ್ಲೆಯ ರಾಮದಿಯೋನ್ ಕಿ ಬಸ್ತಿ ಎಂಬ ಪ್ರದೇಶದಲ್ಲಿ ಒಂದು ವಿಚಿತ್ರ ಸಂಪ್ರದಾಯವಿದೆ. ಅದೇನಪ್ಪಾ ಅಂದ್ರೆ…ಒಬ್ಬ ವ್ಯಕ್ತಿ ಇಬ್ಬರನ್ನು ಮದುವೆಯಾಗಬಹುದು. ವಿಶೇಷವೆಂದರೆ ಮೊದಲ ಹೆಂಡತಿ ಕೂಡ ವಿರೋಧಿಸದಿರುವುದು ದೊಡ್ಡ ವಿಷಯ.
ಹೌದು, ಯಾರಿಗೆ ಆಗಲಿ ಈ ಬಗ್ಗೆ ಕೇಳಿದಾಗ ವಿಚಿತ್ರವೆನಿಸಬಹುದು. ಆದರೆ ಇಲ್ಲಿನ ಸ್ಥಳೀಯ ಜನರು ಇದನ್ನು ಸಾಮಾನ್ಯ ಸಾಮಾಜಿಕ ಸಂಪ್ರದಾಯವೆಂದು ಪರಿಗಣಿಸುತ್ತಾರೆ. ರಾಮದಿಯೋನ್ ಕಿ ಬಸ್ತಿ ಎಂಬುದು ರಾಜಸ್ಥಾನದ ಜೈಸಲ್ಮೇರ್ ಜಿಲ್ಲೆಯಲ್ಲಿರುವ ಒಂದು ಹಳ್ಳಿಯ ಹೆಸರು. ಇಲ್ಲಿ ಅನೇಕ ತಲೆಮಾರುಗಳಿಂದ ಇಬ್ಬರನ್ನು ಮದುವೆಯಾಗುವ ಸಂಪ್ರದಾಯ ನಡೆಯುತ್ತಿದೆ. ಇಲ್ಲಿನ ಜನರು ವಿಶೇಷ ಜಾತಿಗೆ ಸೇರಿದವರು, ಅವರು ತಮ್ಮ ಸಂಪ್ರದಾಯಗಳನ್ನು ಬಹಳ ಹೆಮ್ಮೆಯಿಂದ ಅನುಸರಿಸುತ್ತಾರೆ. ಹಾಗಾಗಿ ಈ ಗ್ರಾಮದಲ್ಲಿ ಪುರುಷರಿಗೆ ಎರಡು ಮದುವೆಗೆ ಅವಕಾಶವಿದೆ.
ಈ ಸಂಪ್ರದಾಯ ಶುರುವಾದದ್ದು ಹೇಗೆ?
ಮೂಲಗಳ ಪ್ರಕಾರ, ರಾಮದಿಯೋನ್ ಕಿ ಬಸ್ತಿ ಗ್ರಾಮದ ಜನರು ಯಾವುದೇ ಪುರುಷನ ಮೊದಲ ಹೆಂಡತಿ ಎಂದಿಗೂ ಗರ್ಭಧರಿಸಲು ಸಾಧ್ಯವಿಲ್ಲ ಎಂದು ನಂಬುತ್ತಾರೆ. ಒಂದು ವೇಳೆ ಗರ್ಭಧರಿಸುವಲ್ಲಿ ಯಶಸ್ವಿಯಾದರೂ ಆಕೆಗೆ ಪುತ್ರಿಯೇ ಹೊರತು ಪುತ್ರನಾಗುವುದಿಲ್ಲ. ಇದರಿಂದ ಗ್ರಾಮದಲ್ಲಿ ಹೆಣ್ಣು ಮಕ್ಕಳ ಸಂಖ್ಯೆ ಹೆಚ್ಚುತ್ತದೆ. ಈ ಕಾರಣಕ್ಕಾಗಿಯೇ ಇಲ್ಲಿ ಪುರುಷರು ಎರಡು ಬಾರಿ ಮದುವೆಯಾಗುತ್ತಾರೆ. ಹೀಗೆ ಮಾಡುವುದರಿಂದ ಅವರ ಕುಟುಂಬದಲ್ಲಿ ಗಂಡು ಮಗ ಹುಟ್ಟುತ್ತಾನೆ. ಆದಾಗ್ಯೂ, ಇಂದಿನ ಆಧುನಿಕ ಮತ್ತು ವಿದ್ಯಾವಂತ ಪೀಳಿಗೆಯು ಈ ಸಂಪ್ರದಾಯವನ್ನು ಸಂಪೂರ್ಣವಾಗಿ ಸರಿಯಾಗಿ ಪರಿಗಣಿಸುವುದಿಲ್ಲ ಅಥವಾ ಅವರು ಅದನ್ನು ಸಂಪೂರ್ಣವಾಗಿ ನಂಬುವುದಿಲ್ಲ.
ಇದಲ್ಲದೇ, ಕಾಲಕಾಲಕ್ಕೆ ಈ ಪ್ರದೇಶದಲ್ಲಿ ಪುರುಷರ ಸಂಖ್ಯೆ ಕಡಿಮೆಯಾಗಿದೆ. ಸಮಾಜದಲ್ಲಿ ಸಮತೋಲನ ಕಾಯ್ದುಕೊಳ್ಳಲು ಎರಡು ಮದುವೆಗಳು ನಡೆದಿರುವುದು ಈ ಸಂಪ್ರದಾಯದ ಹಿಂದಿನ ಕಾರಣಗಳಲ್ಲಿ ಒಂದು ಎಂದು ಕೆಲವರು ವಾದಿಸುತ್ತಾರೆ.
ಸಪೋರ್ಟ್‌ ಮಾಡುವ ಮೊದಲನೆಯ ಹೆಂಡತಿ:
ಈ ಸಂಪ್ರದಾಯವು ಪುರುಷರಿಗೆ ಸಾಮಾನ್ಯವಾಗಿದ್ದರೂ, ಇಲ್ಲಿನ ಮಹಿಳೆಯರೂ ಈ ವ್ಯವಸ್ಥೆಯನ್ನು ಸಂಪೂರ್ಣವಾಗಿ ಒಪ್ಪಿಕೊಳ್ಳುತ್ತಾರೆ. ಇಲ್ಲಿ ಮಹಿಳೆಯರು ತಮ್ಮ ಪತಿ ಹಾಗೂ ಅವರ ಎರಡನೇ ಪತ್ನಿಯನ್ನು ಕುಟುಂಬದ ಭಾಗವಾಗಿ ಪರಿಗಣಿಸುತ್ತಾರೆ ಮತ್ತು ಪ್ರತಿಭಟಿಸುವುದಿಲ್ಲ. ಅನೇಕ ಬಾರಿ ಮೊದಲ ಹೆಂಡತಿಯೇ ತನ್ನ ಪತಿಗೆ ಎರಡನೇ ಹೆಂಡತಿಯನ್ನು ಆರಿಸಿಕೊಡುತ್ತಾಳೆ. ಆದರೆ ಇವೆಲ್ಲಾ ಹಳೆಯ ವಿಷಯಗಳು. ಇಂದಿನ ಯುವ ಪೀಳಿಗೆ ಈ ಸಂಪ್ರದಾಯವನ್ನು ಸಂಪೂರ್ಣವಾಗಿ ಅನುಸರಿಸುವುದಿಲ್ಲ ಮತ್ತು ಎರಡೆರೆಡು ಮದುವೆಯಾಗುವುದನ್ನು ತಪ್ಪಿಸುತ್ತಾರೆ ಎನ್ನಲಾಗಿದೆ.
